اعرفي حقيقه سبب الإجهاضلو حملتي وحصل إجهاض / لِسَّه متزوجه حديثاً و أول حمل ليكي حصل له إجهاض/ أو حتى خلفتي قبل كده مره واتنين بس لما حصل حمل بعديهم حصل إجهاض.

مَش معني انه حصل إجهاض مره يبقى فيه مشكله لازم تتحل ولازملها علاج.

تعملي أيه لو حصلك إجهاض ؟ من ١٥ إلى ٢٠٪؜ من السيدات إلي بتحمل أياً كان حملت أزاي سواء حمل طبيعي أو حقن مجهري هيحصلها إجهاض الأرقام دي نسبه عالميه ومذكوره على موقع منظمة الصحة العالمية والنسبة دي أغلبيتهم لا يوجد سبب للإجهاض ولا داعي لعمل تحاليل أو فحوصات ولا داعي لأخذ علاج (شيء طبيعي أن من كل ٥ سيدات واحدة منهم معرضة للإجهاض) الموضوع مفيش منه قلق لانه بيعمل زعر وخصوصاً على المستوى العائلي.

أشهر سبب للإجهاض أن من سنة الحياه أن البيبي لما أتكون .. أتكون فيه حاجه غلط وغالباً بيكون فيه مشكلة في المادة الوراثيه بتاعته (الDNA ) فربنا سبحانه وتعالي حاطط لنا نظام رباني أن الحمل لو كويس هيكمل ولو الحمل وحش عشان ربنا يحمينا هينزل…. ربنا سبحانه وتعالى هيكمل الحمل لو الطفل كان سليم.

بنسبه ٢٪؜ في أطفال بيتولدوا ربنا يعافينا لديهم تشوهات … لاكن بفضل الإجهاض كانت النسبه هتبقى أعلى بكتير وكنا نشوف حمل كتير مليان مشاكل … عشان كده متزعليش أبداً أنه حصل إجهاض ( زي ما بنقول بالبلدي حرفياً أنه أخد الشر وراح).

٩٠٪؜ من السيدات إلي حصلهم إجهاض بإذن الله حملهم إلي جي هيكمل …. نسبه ١٠٪؜ بس إلي وارد أنه يحصلهم إجهاض تاني.حتى لو حصل إجهاض مرتين ٧٠٪؜ الحمل الثالث بإذن الله هيكمل.

حتى لو لقدر الله حصل إجهاض للمره الثالثه ٥٠٪؜ الحمل إلي جي هيكمل.

يعني بمعني أخر لو حصلك إجهاض مره فرصك دائماً في الحمل إلي جي ان الحمل يكمل أعلى من أنه يحصله إجهاض تاني.

في أوروبا وأمريكا عندهم التأمين الصحي بيرفض حتى أنك تروحي تكشفي أو تعملي تحاليل أو تاخدي علاج لو حصلك إجهاض مره … علمياً مبنبدأش نعمل تحاليل غير بعد ٣ مرات … والكلام الجديد مؤخراً أنه بعد مرتين.

أيه هي الفحوصات؟مجرد زياره بسيطه لو حصلك إجهاض قبل كده لطبيبك الشخصي يطمنك بس على الهرمونات والرحم ويقولك الكلام إلي لِسَّه متقال أن الإجهاض مَش معناه أن في مشكله كبيره مفيش حاجه أسمها أصلها كانت شالت حاجه ثقيله أو أنها عملت مجهود و اتضايقت و اتنرفزت عشان كده حصل إجهاض الكلام دا غير صحيح.

ياريت نحفظ الكلمه دي كويس أوي :الحمل الكويس هيكمل حتى لو بتتنططي والحمل الوحش هينزل حتى لو فضلتي نايمة.

الكلام دا مهم جدا لكل سيده تعرضت للإجهاض والنَّاس وهموها أنها عندها مشكله ومحتاجة تكشف و تتعالج و ميهدلهاش بأل إلا لما تعرف السبب أيه وأنا بقولك مَش هتلاقي سبب لأن أغلب الإجهاضات ملهاش سبب كل الي محتاجه تعمليه هو الوعي الطبي ومتبدأيش تدوري على سبب إلا لو حصل مرتين وساعات كمان بنقول ٣ .