وسائل فحص مخزون المبيض والتحاليل اللازمه لذلك
إزاي تعرفي مخزون المبيض بتاعك كويس ولا لاء … يعني المبيض بتاعك فيه كميه بويضات كتير ولا بويضات قليله.

مَش عايزين ندخل علامات التبويض الجيد بمخزون المبيض ( ممكن يبقى في علامات تبويض جيده (ودي انا اتكلمت عنها في بوست سابق ) لاكن المخزون ضعيف والعكس صحيح ممكن يكون المخزون كتير جداً بس مفيش تبويض خالص زي في حاله التكيسات).

ماهي أختبارات مخزون المبيض؟
– السن
– هرمون ال F.S.H
– ال A.M.H
– عدد الحويصلات البدائيه الموجوده في المبيض

١- السن: ربنا خلق الستات بعدد ثابت من البويضات وبالتالي بالمنطقي ان كل ما سن الست كبر عدد البويضات إلي أتبقت في المبيض قل… علميا أن أعلى نسبه للخصوبه في عمر الست من ٢٠ إلى ٣٠ سنه …. من ٣٠ إلى ٣٥ سنه الخصوبه بتقل ولكن بنسبه بسيطه … من ٣٥ إلى ٤٠ سنه الخصوبه بتقل بنسبه ملحوظه وبعد ال ٤٠ بتكون قليله جداً … وبالتالي هنقول أن فرص الحمل بتقل كلما تقدم السن .

٢- تحاليل ال F.S.H: هرمون بيطلع من الغده النخاميه الموجوده في المخ عشان تروح على المبيض وتعمل تبويض … بتتقاس بتحاليل دم في اليوم ال ٢ او ال ٣ او ال ٤ من الدوره لو طلع نسبته اكتر من ١٢ دا معناه أن المخزون قليل.

٣- تحاليل ال A.M.H : ودا مهم برضوا بيتقاس في الدم ولو طلعت نسبته أقل من ١ دا دليل على ان المخزون قليل.
ال A.M.H فيه ميزه عن ال F.S.H :
– بيتقاس في أي يوم في الدوره مَش شرط ٢ /٣/ ٤ يوم .
– نسبه دقته أعلى من ال F.S.H.
– لازم يتعمل في معمل جيد يكون بيعمل التحاليل بحاجه اسمها (second generation ) الجيل التاني من التحاليل … لانه تحاليل حساس جداً و أي لخبطه بتطلع نتايج غلط.

٤- ال AFC أو عدد الحويصلات البدائيه في المبيض: ودا بنعرفه في بدايه الدوره عن طريق السونار نعد كور صغيره اسمها البويضات البدائيه إلى هتكبر ويحصل منها تبويض كل ما عدد البويضات البدائيه كان كبيره دا دليل أن المخزون كويس ( لازم تتقاس وقت الدوره / لازم تتقاس عن طريق دكتور مختص عشان يطّلع عدد صح).