وسائل الولاده بدون ألم في الولاده القيصرية:

 

– البنج النصفي: كان في بوست سابق اتكلمت فيه عن بنج كلي ولا بنج نصفي ( وقلت ان البنج النصفي ميزته انه بيفضل معاكي من ساعتين ل ٣ ساعات بعد الولاده مش حاسه بالجرح وأحياناً بندي بنج نصفي مع ابيديورال ).

 

– المضخه ( PCA): بيبيقى جهاز وليه زرار ( مجموعه من المسكنات والمهدئات أول ما بتخرجي من الولاده بتبداء تشتغل وطول مانت قاعده في المستشفى مبسوطه وعامله دماغ جميله ومش حاسه بوجع وهتقولي ايه دا هو انا ولدت وتقدري تقومي تتمشي وتتعاملي مع طفلك ودا يقدر يقعد معاكي من يوم لحد ٣ ايام وبعديها بيكون ألم القيصريه قل جداً ويمشي بشوية مسكنات.

 

– في دلوقتي جهاز جديد مدور كده طالع منه انبوب رفيع بيدخل جوه الجرح وبيفضل مفعوله ٥٠ ساعه يعني اكتر من يومين بيقعد بعد القيصرية طول الوقت الجهاز دا بيضخ بنج في مكان الجرح وهتلاقي نفسك بعد القيصريه مفيش ألم حتى مكان الجرح مفيش ألم.

 

– تاب بلوك (TAB BLOCK ): دا أقلهم في الإستخدام ودا عباره عن حقن مواد مخدره في طبقه معينه في البطن بحيث انها تشل احساس الأعصاب إلي وصله لمكان الجرح فيبقى كل جسمك حاسه بيه بس مكان الجرح متخدر.

 

طب انهي طريقه أفضل في القيصريه: لازم تقعدي تتنقشي مع الدكتور بتاعك أنهي وسيله فيهم أفضل ليكي .. أنهي أنسب ليكي وانهي وسيله فيهم هتبقى أنسب لجسمك .