أسباب نقص مخزون المبيض وأمراضه وكيفيه الكشف عنها

– السن : الست ربنا خلقها عندها عدد ثابت من البويضات مَش زي الراجل بيقدر يصنع حيوانات منويه من ساعة البلوغ .. وقت البلوغ عند الستات بيبقى تقريباً عندها ٤٠٠ ألف بويضه ومع كل دوره شهريه بيطلع منهم جزء وبالتالي من المنطقي مع تقدم سن الست مخزون المبيض بيكون قل…. أكتر وقت بيكون قل فيه مخزون المبيض هو بعد سن الأربعين.

– مرض البطانه المهاجره : دا بيجي في صوره أكياس دمويه على المبيض والأكياس الدمويه دي بتفضل تاكل وتدمر في المبيض وتقلل المخزون بتاعه.. وبالتالي وقت أكتشافه لازم علاجه بدري جداً قبل ما المخزون يخلص.

– العمليات الخاطئه إلي بتتعمل في المبيض: أي عمليه في المبيض بتتعمل بصوره خاطئة ممكن تأثر على المخزون زي عمليه استئصال الأكياس بصوره خاطئة .. بتشيل معاه جزء من النسيج بتاع المبيض وبتقلل معاها المخزون…. عمليه التثقيب إلي بتتعمل بالمنظار في مرض التكيسات لو أتعملت في غير محلها بتضعف المخزون.

– الأجسام المضاده: بتبقى حاجات وأجسام صغيره في المناعه بتاعة الست بس بدل ما تفيدها بتهاجم المبيض وبتدمر البويضات إلي جواها و بتقلل المخزون ودي بنعرفها عن طريق تحليل دم بنقيس فيها مستوى الأجسام المضاده .

– التدخين : مع الأسف عشان أحنا بنشوف ستات بتدخن أو بتشرب شيشه وخلفت فبنعتقد أن التدخين مبيأثرش على المبيض ودا غلط … التدخين بيدمر المبيض وبيموت البويضات و بيجيب سن أنقطاع الدوره بدري وبقيه البويضات الموجودة جودتها قليله.

– الإشعاع والكيماوي لقدر الله : لو لقدر الله في تاريخ مرضي قبل كده عن السرطان والست كانت أخدت إشعاع أو كيماوي دا بيدمر المبيض وبيدمر المخزون إلي فيه عشان كده دلوقتي ممكن قبل ما تاخد إشعاع أو كيماوي تسحب البويضات أو حتى نشيل المبيض ذات نفسه لحد ما تاخد الإشعاع أو الكيماوي وبعدين نرجعه تاني .

– خلل في الماده الوراثيه : زي مرض (turner syndrome ) مبيكنش أصلا أتخلق فيه بويضات أو مرض (vginal x syndrome) البويضات إلي فيه بتتكسر في سن بدري جداً ودا مبنشخصهوش غير لما بنعمل تحاليل الماده الوراثية.

بعد كل الأسباب دي في كتير من الستات إلي عندهم نقص مخزون المبيض مبنبقاش عارفين السبب أيه هو … العلم حتى الأن مكشفش كل الأسرار .