ماذا أفعل إذا تأخرت الدوره الشهرية عن موعدها؟

 

ستات كتير بتبقى مش عارفه الدورة بتاعتها اتأخرت ليه وفي الحالة دي ستات كتير بتدخل تقرا على النت وتفضل تجرب حاجات عشان تنزل الدوره ( تشرب قرفة / وإلي ينصح بدوا كده وخلاص / ومأخراً بقى مشهور الدوا إلي بينزل الدورة المتأخره).

هدف البوست دا هو اننا نعرف الطريقه الطبية الصحيحة (تعملي ايه لو دورتك اتأخرت).

 

يعني ايه دوره متأخره؟

– تعتبر الدوره متأخره لو عدى عليها أكثر من ٥ ل ٧ أيام (في حدود الطبيعي مسموح الدوره تتأخر يوم أو اتنين لحد ٧ ايام / يعني مفيش حاجه أسمها الدورة مش منتظمه لو بتقدم عن معادها يوم ولا أتنين او بتتأخر عن معادها يوم او أثنين)بمعنى أخر لو الدور اتأخرت اصبري عليها في حدود ال ٥ل٧ أيام هتنزل فيهم .

 

– لو الدورة عدت ٧ أيام ولسه منزلتش ؟

لو أنت منتظره حمل : تعملي أختبار حمل لو في البول يفضل نجيب أختبار حمل نوعه كويس لأن للاسف في أنواع كتير في السوق غير دقيقه …. أو ناخدها من قاصرها وتريحي نفسك وتعمليها في الدم أفضل حاجه .

 

لو عملت أختبار حمل في الدم وطلعتي مش حامل ؟

نيجي لخطوة أننا نروح للدكتور بتاعنا ونعمل سونار ( في حاجه اسمها الكيس الوظيفي مش كيس دم ومش تكيسات ومش كيس دهني لاء كيس وظيفي).

 

الكيس الوظيفي : عباره عن بويضة عادية بتاعة الشهر كبرت بس مخرجتش من المبيض… عدم خروج البويضة من المبيض بيخليها تتحوصل وتتحول إلى كيس بنسميه كيس وظيفي وهو دا غالباً بيكون سبب تأخر الدورة … نعرفه إزاي بنعرفه بالسونار … ايه سببه ؟

ملوش سبب محدد ممكن يجي لأي ست في أي عمر بالذات إلي سنهم صغير او إلي سنهم كبير أوي … وبنسميه كيس وظيفي عشان مش محتاج تدخل جراحي .. هتلاقي حجمه صغير ومكوناته غالباً بتبقى ميا (مش دم ولا دهون) وسهل جداً تشخيصه في السونار… في حالة وجود الكيس الوظيفي في السونار بنديكي شوية أدوية تخلي الكيس الوظيفي دا يختفي والدورة بتاعتك تنزل وترجع تنتظم تاني ونرجع نعيد السونار تاني عشان نتأكد أن الكيس الوظيفي أختفى.

الكيس الوظيفي مش محتاج تدخل جراحي فقط يحتاج إلى العلاج.

 

طب أيه أسباب تأخر الدورة الشهرية في العموم ؟

– الكيس الوظيفي.

– التكيسات (التكيسات بتعمل عدم إنتظام في التبويض وبالتالي عدم إنتظام في الدوره).

– المخزون الضعيف( المخزون القليل بيبقى عدد البويضات قليله فخروجها من المبيض بيبقى قليل).

– الضغوط النفسيه (بشكل عام الضغط النفسي القوي بيخلي هرمونات التبويض مبتخرجش بشكل منتظم من المخ فميطلعش بويضات كل شهر فالدورة تتأخر )

ومن هنا جت كمان الحمل الكاذب الستات إلي بيبقى نفسها يحصل حمل وبشدة من كتر الضغط النفسي يوقف عندها التبويض ويأخر الدوره فهي نفسياً تحس أنها حملت حتى تلاقوا في الأفلام الأبيض والأسود دي عندها حمل كاذب هو عباره عن ضغط نفسي خلى الدوره تتأخر

وبننصح المدام تروح تريح أعصابها يومين في العزبه.

رزقكم الله بالذريه الصالحة.